Neve Entwistle sy’n defnyddio Parc Sglefrio Glannau Dyfrdwy yn cael ei choroni’n Bencampwr y Byd Merched 2025

Mae Gwella yn dathlu cyflawniad chwaraeon mawr yr wythnos hon ar ôl i’r reidiwr sgwter lleol, Neve Entwistle, sy’n 18 oed ac yn dod o Bromborough, Cilgwri, ddod yn gyntaf ym Mhencampwriaeth Parciau’r Byd i Ferched yn Japan.

Teithiodd Neve i Japan yn gynharach yr wythnos hon i gystadlu yn erbyn reidwyr gorau’r byd a llwyddodd i ddod i’r brig gan roi Glannau Dyfrdwy ar y map yn y gymuned sgwter ryngwladol.

Stori llwyddiant lleol

Dechreuodd Neve reidio ym Mharc Sglefrio Canolfan Hamdden Glannau Dyfrdwy pan oedd yn 13 oed ac mae wedi bod yn hyfforddi yno fyth ers hynny. Mae hi’n cystadlu ar draws y byd bellach ac mae’n parhau i ddarparu sesiynau hyfforddiant yn yr un lle ag y dechreuodd ei thaith.

Meddai Neve: “Rydw i mor falch o fod wedi ennill a dod yn Bencampwr y Byd. Mae’n braf gwybod bod yr holl waith caled a’r ymarfer wedi bod werth yr ymdrech. Hoffwn i ddweud diolch yn fawr iawn wrth fy rhieni, fy noddwyr yn Chilli Scooters a phawb arall sydd wedi fy nghefnogi ar y daith gan gynnwys pawb ym Mharc Sglefrio Glannau Dyfrdwy. Rydw i’n edrych ymlaen at weld beth fydd y dyfodol yn ei gynnig i mi.”

Dywedodd llefarydd ar ran Gwella: “Mae Glannau Dyfrdwy yn adnabyddus ar draws y wlad am ei dreftadaeth sglefrio iâ ond rydym am roi ein hathletwyr o’r parc sglefrio ar y map hefyd. Rydym yn hynod falch o Neve. Mae hi’n fodel rôl arbennig i bobl ifanc yng Nglannau Dyfrdwy ac yn llysgennad gwych i’r gamp. Mae gweld rhywun fu’n dysgu yma yn ein parc sglefrio yn dod yn bencampwr byd yn ysbrydoliaeth i bob plentyn sy’n dod trwy ein drysau.”

Galw cynyddol am hyfforddiant sgwter a pharc sglefrio

Mae Neve yn darparu sesiynau hyfforddiant sgwter rheolaidd ym Mharc Sglefrio Glannau Dyfrdwy, gan gynnwys gwersi i ddechreuwyr, sesiynau iau ac i oedolion a chlybiau sgwter strwythuredig. Mae Gwella wedi gweld cynnydd cryf ac anogol o ran galw am weithgareddau sgwter a pharc sglefrio y tymor hwn, gyda mwy o deuluoedd lleol yn dewis campau gweithgar i gadw pobl ifanc yn actif, hyderus ac wedi’u diddanu.

Ychwanegodd y llefarydd: “Mae chwaraeon parc sglefrio yn cynnig buddion mawr i bobl ifanc, o weithgarwch corfforol a chydbwysedd i hyder, cadernid a chyswllt cymdeithasol. Mae plant yn dysgu sgiliau newydd,

gwneud ffrindiau ac aros yn actif mewn amgylchedd diogel dan oruchwyliaeth. Dyna’n union beth mae Gwella yn ceisio ei hybu.”

Cynhwysol a hygyrch i bawb

Mae Parc Sglefrio Canolfan Hamdden Glannau Dyfrdwy yn cynnal sesiynau ar gyfer sgwteri, reidwyr BMX a sglefrfyrddwyr, gan gynnwys sesiynau cynhwysol a blasu sy’n addas i bob gallu. Mae hyfforddwyr cymwys yn cefnogi pobl ifanc i feithrin sgiliau ar eu cyflymder eu hunain mewn amgylchedd cadarnhaol a chefnogol.