Ffitrwydd, Bwyd a Darllen 2026: Gweithgareddau am ddim dros wyliau’r haf ledled Sir y Fflint

Mae Ffitrwydd, Bwyd a Darllen yn ôl yr haf hwn, a bydd yn cynnig gweithgareddau, bwyd, diodydd a chyfleoedd darllen am ddim i gymunedau ledled Sir y Fflint yn ystod gwyliau’r ysgol.

Mae’r rhaglen gwyliau haf am ddim hon sydd wedi’i chyflwyno gan Gwella mewn partneriaeth â Chyngor Sir y Fflint, Cynghorau Tref Sir y Fflint, Actif Gogledd Cymru a Farrall’s Group, yn cefnogi plant a theuluoedd trwy gyfuno gweithgareddau corfforol hwyliog, gemau, sesiynau creadigol, llyfrau a bwyd mewn mannau cymunedol lleol.

Nid oes angen archebu lle ac mae bwyd a diodydd wedi’u cynnwys.

Beth yw Ffitrwydd, Bwyd a Darllen?

Mae Ffitrwydd, Bwyd a Darllen yn rhaglen rad ac am ddim i blant, pobl ifanc a theuluoedd ledled Sir y Fflint.

Mae’r rhaglen yn rhoi cyfle i deuluoedd wneud ymarfer corff, rhoi cynnig ar brofiadau newydd, mwynhau bwyd a diodydd, darganfod llyfrau newydd a chymryd rhan mewn gweithgareddau hwyliog yn ystod gwyliau’r haf.

Mae sesiynau’n digwydd yng nghanol cymunedau lleol, gan helpu i gael gwared ar rwystrau a rhoi cyfle i deuluoedd gymryd rhan mewn gweithgareddau a chael cefnogaeth am ddim yn agosach at adref.

 

Pryd mae’n cael ei gynnal?

Caiff Ffitrwydd, Bwyd a Darllen 2026 ei gynnal rhwng dydd Llun 20 Gorffennaf a dydd Gwener 21 Awst.

Bydd sesiynau’n cael eu cynnal bob dydd o’r wythnos mewn cymunedau penodol ledled Sir y Fflint.

 

Ble mae’n cael ei gynnal?

Bydd rhaglen eleni yn ymweld â 10 o gymunedau yn Sir y Fflint:

• Y Fflint
• Sealand
• Saltney
• Cei Connah
• Bwcle
• Aston
• Mostyn
• Treffynnon
• Treuddyn
• Yr Wyddgrug

Mae’r amserlen lawn i deuluoedd ar gael isod.

Gallwch chi hefyd lawrlwytho’r amserlen yma

 

Beth all teuluoedd ei ddisgwyl?

Mae’r sesiynau Ffitrwydd, Bwyd a Darllen wedi’u cynllunio i fod yn gyfeillgar, croesawgar ac am ddim.

Gall y gweithgareddau gynnwys:

• Chwaraeon a gweithgareddau corfforol
• Gemau
• Crefftau a gweithgareddau creadigol
• Sesiynau darllen
• Gweithgareddau llyfrgell deithiol Gwella
• Gweithgareddau bownsio
• Bwyd a diod

Gall gweithgareddau amrywio yn ôl lleoliad a dyddiad.

 

Oes angen i mi archebu lle?

Nid oes angen archebu lle. Gall teuluoedd ddod draw i’w sesiwn lleol a chymryd rhan. Mae’r gweithgareddau a gynigir yn dibynnu ar yr hyn sydd ar gael.

 

A yw bwyd wedi’i gynnwys?

Ydy, mae bwyd a diodydd wedi’u cynnwys yn rhan o’r rhaglen.

 

Pam mae Ffitrwydd, Bwyd a Darllen yn bwysig?

Gall gwyliau’r haf roi pwysau ychwanegol ar deuluoedd, o ddiddanu’r plant a’u cadw’n brysur i ddod o hyd i bethau fforddiadwy i’w gwneud.

Mae Ffitrwydd, Bwyd a Darllen yn helpu trwy greu mannau croesawgar yn rhad ac am ddim lle gall plant fod allan yn yr awyr agored, symud mwy, treulio amser oddi wrth sgriniau, dod o hyd i ddiddordebau newydd, mwynhau darllen a chysylltu ag eraill.

Yr haf diwethaf, croesawodd Ffitrwydd, Bwyd a Darllen dros 5,300 o blant, pobl ifanc ac aelodau o’u teuluoedd ar draws 45 o sesiynau, gwnaethon nhw ddarparu 3,520 o brydau bwyd a rhannu 800 o becynnau Sialens Ddarllen yr Haf.

Mae cynnal y rhaglen yn bosibl o ganlyniad i gyllid partneriaeth a chydweithio, gan ddod â hamdden, llyfrgelloedd, mannau cymunedol a sefydliadau lleol ynghyd i gefnogi teuluoedd ledled Sir y Fflint.